Prifysgol Glyndwr Wrecsam ar y brig am foddhad myfyrwyr yng Nghymru a Lloegr
Gwerthoedd o fod yn hygyrch, yn gefnogol, yn arloesol ac yn uchelgeisiol yn cyfrannu at brofiad cadarnhaol.
Mae Prifysgol Glyndwr Wrecsam wedi cael canmoliaeth mewn canllaw diweddar
Ysgrifennwyd gan Geraint Wyn Jones
Mae Canllaw Prifysgolion Cyflawn (CUG) wedi gosod Prifysgol Glyndŵr Wrecsam ar frig y tabl am foddhad myfyrwyr yng Nghymru a Lloegr, ac yn ail yn y DU gyfan, yn nhabl 2023 sydd newydd ei gyhoeddi.
Mae'r Canllaw, a luniwyd gan IDP Education Ltd, yn rhyddhau tablau Prifysgolion y DU a thablau cynghrair pwnc i gefnogi darpar fyfyrwyr i wneud penderfyniadau gwybodus am eu dyfodol.
Daw'r cynnydd mewn boddhad a deimlir gan fyfyrwyr am eu profiad yn Glyndŵr ar ôl arddangosiad tebyg yng Nghanllaw Prifysgolion Y Guardian fis Medi diwethaf.
O fewn safleoedd pwnc unigol y canllaw, roedd Glyndŵr hefyd yn gyntaf am foddhad myfyrwyr o fewn tri maes pwnc.
Amaethyddiaeth a Choedwigaeth – lle mae Glyndŵr yn cynnig cyrsiau mewn Lles Ymddygiad Anifeiliaid BSc (Anrh), Gwyddor Cadwraeth gyda Blwyddyn Sylfaen BSc (Anrh) a Gwyddor Ceffylau a Rheoli Lles BSc (Anrh).
Nyrsio – lle mae Glyndŵr yn cynnig cyrsiau BN (Anrh) mewn Nyrsio Oedolion, Nyrsio Plant a Nyrsio Iechyd Meddwl.
Cymdeithaseg – lle mae Glyndŵr yn cynnig cyrsiau mewn Troseddeg a Chyfiawnder Troseddol (BA Anrh) a'r Gyfraith a Chyfiawnder Troseddol (BA Anrh).
Mae'r tablau pwnc yn seiliedig ar bum mesur (Safonau Mynediad, Boddhad Myfyrwyr, Ansawdd Ymchwil, Rhagolygon Graddedigion – canlyniadau a Rhagolygon Graddedigion – ar y trywydd iawn) ac maent yn cynnwys 150 o brifysgolion, colegau prifysgol a sefydliadau addysg uwch arbenigol.
O fewn y tabl pwnc Addysg, mae Glyndŵr wedi gweld cynnydd trawiadol iawn o 68 o leoedd ar gyfer boddhad myfyrwyr.
Wrth siarad am yr ymdeimlad cadarnhaol o foddhad a deimlir gan fyfyrwyr ym Mhrifysgol Glyndŵr Wrecsam, dywedodd y Dirprwy Is-Ganghellor, yr Athro Claire Taylor: "Mae'r canlyniad trawiadol hwn yn adlewyrchu'r gofal a'r ymrwymiad a ddangoswyd gan bawb yn y brifysgol i sicrhau bod ein myfyrwyr yn cael y cyfleoedd gorau posibl i lwyddo yn eu hastudiaethau.
"Ym Mhrifysgol Glyndŵr Wrecsam rydym yn ymfalchïo yn ein gwerthoedd o fod yn hygyrch, yn gefnogol, yn arloesol ac yn uchelgeisiol.
"Mae lefelau uchel o foddhad myfyrwyr yn adlewyrchu'r dull hwn ac rydym wrth ein bodd bod y Canllaw Prifysgolion Cyflawn yn cydnabod y profiad cadarnhaol sydd gan fyfyrwyr pan fyddant yn astudio gyda ni."
Mae'r tablau pwnc hefyd yn adlewyrchu safle o'r radd flaenaf ar gyfer Rhagolygon Graddedigion yn y categori Adeiladu, lle mae Glyndŵr yn cynnig cyrsiau mewn Technoleg Dylunio Pensaernïol (HNC) a BSc (Anrh) mewn Rheoli Adeiladu.
